У Музеі ткацтва прайшлі музейныя ўрокі, прысвечаныя Вялікадню

Праваслаўныя вернікі ў мінулую нядзелю адзначылі Уваскрэсенне Хрыстова — адно з галоўных хрысціянскіх святаў. А якія ў яго карані? Што значыў Вялікдзень для беларусаў стагоддзі таму?

Пра гэта можна даведацца ў Музеі традыцыйнага ручнога ткацтва Паазер’я Нацыянальнага полацкага гісторыка-культурнага музея-запаведніка. Для юных палачан цягам мінулага тыдню тут ладзіліся музейныя заняткі.

— Занятак «Велікодныя традыцыі беларусаў» — для таго, каб дзеткам нагадаць тое, што і зараз адбываецца, у прынцыпу — Пасха досыць шырока святкуецца, — і таксама расказаць пра тое, што было раней, як нашы продкі ўспрымалі гэтае свята, — патлумачыў старшы навуковы супрацоўнік Музея традыцыйнага ручнога ткацтва Паазер’я Стась Сілка.

Заняткі для маленькіх школьнікаў у Музеі ткацтва праводзяцца даволі часта. На такіх сустрэчах раскрываецца тэма ткацтва — распавядаюць пра ручнікі, паясы, ткацкія прылады. Ладзяцца і ўрокі, прысвечаныя традыцыйным беларускім святам. Велікодны занятак у «рэпертуары» музейшчыкаў з’явіўся у гэтым годзе.

— Вялікдзень — гэта не зусім Пасха. Пасха — гэта ўжо больш хрысціянскае напластаванне такое. А Вялікдзень — больш старажытнае, архаічнае свята. Вось мы трошкі спрабуем расказаць пра гэта, у гонар чаго яно адзначалася, — распавёў Стась Сілка.

Распавялі і пра традыцыі больш сучасныя. Чаму на свята Уваскрэсення Хрыстова пякуць кулічы і фарбуюць яйкі? У якія гульні могуць гуляць у Вялікдзень маленькія беларусы? Праводзяць музейшчыкі і майстар-клас — дапамагаюць дзеткам рабіць велікодныя паштоўкі. І, вядома, спяваюць.

Музейныя заняткі, прысвечаны Вялікадню, наведалі школьнікі 9 класаў розных навучальных устаноў. Супрацоўнікі музея перакананыя, што падобныя сустрэчы — цудоўная магчымасць распавесці юным беларусам пра традыцыі нашых продкаў.

Ігар ПАЛЫНСКІ.
Відэа Сяргея ЗАЛЫНСКАГА.