У Полацку прайшла VII Канферэнцыя «Гісторыя і археалогія Полацка і Полацкай зямлі»
Гісторыю і археалогію Полацка і Полацкай зямлі абмяркоўвалі ў Нацыянальным Полацкім гісторыка-культурным музеі-запаведніку. VII Міжнародная навуковая канферэнцыя прайшла ў першыя дні лістапада ў горадзе над Дзвіной.
— Канферэнцыя традыцыйная. Адметнай рысай з’яўляецца тое, што сёння — 30 год, як мы яе праводзім. Канферэнцыя адбываецца кожныя 5 гадоў і супадае з юбілеямі Полацка, — распавяла Тамара Джумантаева, дырэктар Нацыянальнага Полацкага гісторыка-культурнага музея-запаведніка.
Навукоўцы, якія вывучаюць гісторыю і археалогію Полацкай зямлі, упершыню сабраліся на падобную імпрэзу ў 1987 годзе. У сёлетняй канферэнцыі прыняла ўдзел Таццяна Рудава —дырэктар Полацкага гісторыка-культурнага музея-запаведніка ў тыя гады. Усяго ў працы канферэнцыі паўдзельнічалі болей за 30 навукоўцаў. Іх кола — даволі шырокае.
— Асноўная частка выступоўцаў — беларусы: Акадэмія навук, іншыя інстытуцыі. Заўжды ў нас бываюць расіяне, у гэтым годзе — пэўнае кола людзей, якія займаліся вывучэннем архітэктурнай археалогіі на тэрыторыі Спаса-Еўфрасіннеўскага манастыра, — распавяла Тамара Аляксандраўна.
Тэмы выступленняў ўдзельнікаў не абмяжоўваюцца, аднак падчас кожнай канферэнцыі выяўляецца цікавасць да пэўнай з’явы. Пяць год таму шырока абмяркоўваліся фрэскі Спаса-Праабражэнскай царквы, цяпер на павестцы дня — вынікі археалагічных даследаванняў на тэрыторыі манастыра. Сёлета святкуе 50-гадовы юбілей Нацыянальны Полацкі гісторыка-культурны музей-запаведнік, юбілейная дата таксама не засталася па-за ўвагай.
— Дэ-юрэ мы ёсць з 19 верасня 1967 года. На гэты конт у самым пачатку канферэнцыі быў мой даклад, — адзначыла Тамара Джумантаева.
З нагоды юбілею супрацоўнікі аддзела фондаў музея-запаведніка падрыхтавалі незвычайную выставу. Яна экспануецца ў Музеі беларускага кнігадрукавання побач з канферэнц-залай. Удзельнікі навуковай канферэнцыі, якая доўжылася два дні — 1 і 2 лістапада, мелі магчымасць пазнаёміцца з ёй у перапынках.
Ігар ПАЛЫНСКІ.
Відэа Сяргея ЗАЛЫНСКАГА.
